Književna manifestacija „Auto(r) na korzou“ imala je svoj neplanirani nastavak. Dvojica mladih nikšićana provozala se glavnim gradskim trgom. Da li se radilo o spontanom mladalačkom hiru ili, pak, o jednoj recepciji poetskog diskursa? Ukoliko je po srijedi druga mogućnost, onda bi vožnja trgom koji je bio locus književne manifestacije „Auto(r) na korzou“ bilo znakovito (ne)razumijevanje književnosti kod nove generacije, u stilu Brehtovog „totalnog teatra“ ili Gadamerove „apsolutne poezije“.
Drugim riječima, vožnjom u pješačkoj zoni, mladići nisu samo napravili potencijalno opasni saobraćajni incident već prije demonstrirali jedno performativno razumijevanje poezije. Time je Helderlinova tvrdnja da je poezija „najopasnije od svih zanimanja“ dobilo novu interpretaciju.
To znači da stanje u našem obrazovanju nije toliko beznadežno, jer saobraćajni incident bi zapravo mogao biti jedna recepcija, jedno razumijevanje književnosti. Ipak, fabula docet cijelog događaja, osim novčane kazne, mogao bi se naći u estradnim stihovima:
„Neću s tobom, kume,
ćelave ti gume,
sedišta se tresu,
u tvom mercedesu“.
Elem, djecu treba učiti da njeguju kulturu čitanja, tumačenja i razumijevanja književnih djela.
Milovan Urvan
