Piše: Oliver Janković
Drugo kolo Vimbldona. Autsajderi igraju na sve ili ništa, a veliki se muče. Ono, nije baš da se muče, ali zastajkuju pod naletima mladih protivnika željnih senzacije. Beretini ne spada u mlađe, ali nekadašnji finalista ovog turnira nastupa iz četvrtog ili petog ešalona pretendenata na ovogodišnji trofej. I kao takav, uvjerio je Sinera da nije lako braniti br. 1 na ATP listi, već na samom početku velikih takmičenja.
Za to vrijeme, Novak se mudro, taktički povukao na mjesto br 2, i otišao među isposnike. Naime, u ovoj godini Đoković nema još ni jedan trofej. I tako gladan finala i osvajanja, tek oporavljen od manjeg hirurškog zahvata, lagano se razigrava u početnim kolima travnatog gren-slema, dijeleći voleje i poluvoleje po Londonu, kao nekad Dule Savić!
Juče mu je takmac bio 22-godišnji Škot Firnli, koji, uz svu mladost i očigledno teniskog znanje nije mogao da učini ništa bitno protiv „starog junaka“. Ali uspio je da uzme set. Onoliko koliko protivnici otimaju Sineru. I uspio je da zaprijeti izjednačenjem u setovima. Novak je servirao za ostanak u četvrtom setu kod 5:4 za Britanca. Ali upravo se tu desilo ono što kvalitativno dijeli Đokovića od škotskog junoše. 3 : 0 u gemovima za Srbina i dođosmo do laganih, bezopasnih, samouvjerenih 3 : 1.
